Labadii maalin ee ugu dambeysay waxaa ciidanka Abi Axmed u suurtagalay in ay dib u soo ceshadaan 3 magaalo oo istaraatiiji ah kuwaasi oo Tigreyga ay horay xoog uga qabsadeen.
XAQIIQO NEWS- WARARKA DIBADDA
Isniintii, ra’iisal wasaaraha foronta hore ku sugan ee Itoobiya Abi Axmed ayaa sheegay in ciidankiisu ay dib u qabsadeen seddex magaalo oo dhaca ismaamulka Amxaarada, balse jabhadda Tigreey oo ka hadlay xaaladda taagan ayaa sheegay in ay ka baxeen goobo u dhawaa caasimadda Adis-Ababa.
Magaalooyinka waxaa ka mid ah Dessie, Kombolcha iyo Bati oo ah kuwo dhaca waddooyin muhiim ah oo isku xira Jabuuti iyo Adis Ababa.
Abi Axmed Waxa uu carabka ku dhuftay in Tigreyga dib looga qabsaday dhammaan goobihii ay kaga sugnaayeen deegaanada Amxaarada iyo Canfarta.
Abi Axmed ayaa hadalkiisa ku daray “deegaanada Tigreygu ku qaadatay in 5 bilood gudaha u soo galaan, waxaan ku soo ceshanay 15 maalin”.
Getachew Reda oo u hadlay jabhadda Tigreey ayaa ka bixitaankooda deegaanada ku tilmaamay dib u gurasho horay loo qorsheeyey.
Dhinacyada Itoobiya ku hardamaya dagaalka sanad jirsaday ayaa dhowr mar lagu eedeeyey in ay sameeyeen falal ka dhan xaquuqda aadanaha oo lagula kacay dad rayid ah.
Waxaana soo baxaya baaqyo ku aadan ilaalinta xaquuqda aadanaha, gaar ahaan labada dhinac ayaa laga dalbaday in ay dhowraan dadka ka shaqeeya caafimaadka iyo gargaarka aadanaha.