Bardaale Ka Dib Baardheere ..Maxaa Ka Qaldan Diyaaradaha Kenya?

Mid ka mid diyaaradaha gaboobay ee Kenya rakaabka u isticmaasho, ayaa lagu soo waramayaa in ay ku dhacday garoonka Baardheere ee gobolka Gedo.


Xaqiiqonews-Wararka Gudaha

Sida uu qoray webseetka Caasimadaa online, diyaaradda burburtay waxa uu nooceedu ahaa Fokker 50 kuna diiwaan-gahan 5Y WFC oo ay iska leedahay shirkadda duulimaadyada Buff Air Service ee bixisa adeegyo badan oo isugu jira in la daabulo rakaabka, agabka kale iyo qalabkaba.

Inkastoo aysan jirin wax khasaara nafeed ah, waxaa sawirada shilka ka muuqday burbur gaaray diyaaradda, maamulka gobolka Gedo ayaana sheegay in ay dib ka faafaahin doonaan waxa dhacay.

Diyaarad Kenya Leedahay oo ku soo dhacday Soomaaliya Baardheere

Maxay arintani u soo noqnoqotay?

Isniin, 25 bishii May 2020, diyaarad Kenya leedahay ayaa la kulantay rasaas toogasho, xilli ay dul mareysay degmada Qansaxdheere , ilaa iyo haddana lama oga cidda ka dambeysay.

isla bishaas 4 May, waxaa deegaanka Bardaale lagu soo riday diyaarad Fokher 50 ah oo ay laheyd Kenya, waxaana arintaasi markii ugu dambeysay qirtay ciidanka Itoobiya.

Dhamaadkii 2019, bishii Oktoobar diyaarad nooceedu ahaa Fokher 50 oo ka kacday Nayroobi kuna sii jeeday Mombasa ayaa burburtay, waa arinta shaki weyn gelineysa badqabka diyaaradahan oo ah farsamadii sideedameeyada.

FADLAN QEYBTA HOOSE KU DHIIBO ARAGTIDAADA