Maxaa Xal Ah..Dagaal Mise Doorasho

La Wadaag Asxaabtaada

Go’aankii ugu dambeeyey ee Madaxweynaha waqtigiisa dhammaaday ee Farmaajo uu ka jeediyey golaha shacabka waxa ay biyo qabow ku shubtay colaadii beryihii ugu dambeeyey Xamar ka aloosneed, inkastoo uu ka socdo guux hoose xaaladda ayaa ah mid dagan.


XAQIIQO NEWS- FIKRDAHA

Shaki iigama jiro in dagaaladii ka dhacay magaalada Muqdisho ay xambarsanaayeen dhowr fariin oo muhiim ah:

1-In Soomaalida wili aysan ka bogsoonin isticmaalka “luuqadda dhiigga” si ay gudbiyoon fikirkooda.

2-Dagaalkii dhacay waxa uu horudhac u ahaa dagaalo kale oo dhici kara waqti walbo

3- iyo fariinta ugu muhiimsan oo aheyd “nin walba ninkiisa ha nooleysto”, fiiri xitaa qolyihii mucaaradka wada ahaa ma aysan qodanin hal dhufeys.

Waxaa ii haray..tan iyo markii ay bilaabatay xiisadda ku saleysan “mucaarad iyo muxaafid”, magaalada Muqdisho waxaa ka dhacay falal dulmi ah oo aan magaalada ka dhicin muddo ku dhaw 15 sano.

Sida ay ii sheegaan dad ka dhawaa goobtii falka ka dhacay, ciidankii mucaaradka waxa ay dileen nin milkiile ah kaasi oo diiday in gurigiisa dhufeysa laga galo.

Maxaa Xal ah?

Hadda xaalka waa uu dagan yahay, waxaana jira heshiisyo horudhac ah oo garwadeen ka yahay ra’iisal wasaare Rooble, hase yeeshee taasi meesha kama saareyso in aan is weydiina maxaa xal ah? dagaal mise doorasho.

Ani fikirkeyga labaduba xal ma ahan, xalka ugu fiican waxaa ku jiraa in la helo siyaasiyiin waxbaratay, ciidan waxbartay iyo shacab ilbax ah kuwaasi oo fikirkooda soo gudbin kara iyaga oo aan dulminin qof kale.

Ugu dambeyn..waxaa jira dad u sacab tumaya dagaalka iyaga oo aaminsan in ay si un “awood u helayaan”, balse taariikhda ayaa dadkaasi ku leh: ha farxina dunida sidaasi uma shaqeyso, ogaada inta ugu badan waxa niyadaada ku jira in ay ku baa bi’ doonaan todobaadyada koowaad ee dagaalka.

FADLAN QEYBTA HOOSE KU DHIIBO ARAGTIDAADA
La Wadaag Asxaabtaada