Maalin ka dib markii Xasan Shiikh loo dhaariyey madaxweynenimada, Biden ayaa oodda ka qaaday go’aan sii qorsheysnaa oo ciidanka Mareykanka dib loogu celinaayo Soomaaliya.
XAQIIQO NEWS- WARARKA GUDAHA
Qaladkii ugu horeeyey ee Xasan Shiikh uu galo markii dib loo doortay waa sida fudud ee u soo dhaweeyey in ciidamo shisheeya ah dalka la keeno-sida ay aaminsanyihiin khubarrada amaanka iyo siyaasadda.
Khubarrada oo kaliya ma ahan kuwa Xasan u arka wadadii Mareykanka uu Soomaaliya ka soo gali lahaa, waa tan Elizabeth Shackelford oo ah diblomaasi sare oo ka tirsan arimaha dibadda Mareykanka waxa ay soo laabashada Xasan Shiikh ku tilmaamtay “fursad” uu Mareykanka kaa faa’ideysan karo si uu dib u habeyn ugu sameeyo danihiisa.
Elizabeth Shackelford oo ah haweeneyda qortay buugga “diboomaasiyadda Mareykana ee waqtigan nifaaqa(American Diplomacy in a Dishonest Age)” waxa ay leedahay Xasan Shiikh waxa uu noo badali karaa Ashraf Ghanigii Afghanistaan, maqaal ay ku qortay wargeyska Chicago Tribune.
Inkastoo Mareykanka uu ku doodaayo “la dagaalanka argigixisada”, haddana Elizabeth Shackelford waxa ay leedahay Al-shabaab halis toos kuma ahan ammaanka dalkeena hooyo ee Mareykanka.
Dhanka kale, waxaa baraha bulshada ka bilowday kacdoono ay dadka kaga soo horjeesanayaan duulaanka Mareykanka ee Soomaaliya, waxaana Tuwiterka lagu baahiyey sawirrada ficillo ay ciidanka Mareykanka ka geysteen Soomaaliya.
Afrikan foorum ayaa baahiyey sawirrada askar Mareykan ah oo dad gumaadaya iyaga oo ku dul qoray “Qaabka Mareykanka uu Soomaaliya dhaxdeeda uga faafinaayo dimoqaraadiyadda”.