Somaliland oo ku dhawaaqday inay sanadkan joojisay dabaal-dega 18 May

Maamulka Somaliland ayaa ku dhawaaqay inay sanadkan joojiyeen dabaal degyada iyo xuska loo sameyn jiray 18-ka May oo ah maalintii Somaliland ku dhawaaqday inay ka go’day Soomaaliya inteeda kale.

Wasiirka Warfaafinta Somaliland Cusmaan C/llaahi Saxardiid (Caddaani) ayaa sheegay in sababta ay u joojiyeen xuska dabaal dega 18-ka May ay tahay xaaladaha abaareed ee ka jira deegaanada Somaliland.

Waxaa uu sheegay in Madaxweynaha Somaliland go’aamiyay in sanadkan aan la dhigin dabaal degyadii 18 May, sidaas darteed wixii dhaqaale ee ku bixi jiray dabaal degyada loo wareejinayo gurmadka abaaraha.

Waxaa uu ugu baaqay qurba joogta qaban jirtay xafladaha dabaal dega 18 May inay u bedelaan qaaraan-uruurin, si wax loogu qabto dadka ay saameeyeen abaaraha ee soo barakacay.

Deegaanada Somaliland ayaa waxay ka mid yihiin meelaha ay ku dhifteen abaaraha, waxaana jira dad iyo duunyo u le’day haraad iyo gaajo.

Somaliland ayaa sanadkii 1991 ku dhawaaqday inay ka go’day Soomaaliya inteeda kale, 26 sano oo ay ka soo wareegatay gooni isu taaggeeda ma jirto illaa iyo hada aqoonsi caalami ah oo ay heshay

FADLAN QEYBTA HOOSE KU DHIIBO ARAGTIDAADA