Afhayeenka Milatari ee kooxda Ansaarulaah, Yaxye Sariic ayaa shaaciyey in nooca gantaalada ay la beegsadeen garoonka diyaaradaha Abuu dabi ay ahaayeen afar gantaal oo kuwa garbaha leh ah oo lagu magacaabo “Qudus 2” halka garoonka Dubeyna lala beegsaday gantaalka balaastiga ah ee “Thul faqaar”.
XAQIIQO NEWS- WARARKA DIBADDA
Subaxnimadii hore ee Isniinta, weeraro khasaaro geystay ayaa lala beegsaday bartilmaameedyo muhiim ah oo ku yaala Imaaraatka.
Kooxda Xuutiyiinta ee la baxay Ansaarulaah kuwaasi oo xiriir la leh Iiraan ayaa sheegtay mas’uuliyadda weeraradii Imaaraatka lagu qaaday.
Yaxya Sariic ayaa yiri “Intii uu socday howlgalka ‘Duufaantii Yemen’ waxaa la adeegsaday afar ganaal oo ah nooca garbaha leh ee qudus2 kuwaasi oo lala beegsaday goobta saliidda lagu sifeeyo ee “musafah” iyo garoonka Abu Dabi”
Waxa uu intaasi ku daray “Gantaalka balaastiga ah ee ‘Thul qafaarna” waxaa lala beegsaday garoonka diyaaradaha ee Dubeey”.
Yaxye Sariic ayaa weerarkii ay ku qaadeen Imaaraatka ku micneeyey digniin cusub oo ay markale u dirayaan waxa uu ugu yeeray “dowladaha cadowga ah”.
Dhanka kale weeraro duqeymo ah oo Caasimadda Yemen Sanca ay ka fuliyeen isbaheysiga uu hogaaminaayo Sacuudiga ayaa waxaa lagu soo waramayaa in ay ku dhinteen 14 qof.
Dadka ku dhintay duqeynta ayaa dhammaantood ku sugnaa hal dhismo, waxaana duqeynta cusub ee imaaneysa maalin ka dib markii kooxda Xuutiyiinta ay weerar ku qaadeen Imaaraatka.